چاندوڑ گھاٹ میں خوفناک سڑک حادثہ، دادا پوتا جاں بحق، دو افراد شدید زخمی

مالیگاؤں (اسٹاف رپورٹر) چاندوڑ گھاٹ میں پیش آئے ایک دلخراش سڑک حادثے میں مالیگاؤں کے دو افراد جاں بحق جبکہ دو دیگر شدید زخمی ہوگئے۔ حادثے کے بعد علاقے میں افراتفری مچ گئی اور مقامی افراد بڑی تعداد میں موقع پر جمع ہوگئے۔

موصولہ اطلاعات کے مطابق ایک تیز رفتار کرین نے اسپیڈ بریکر کے قریب پیچھے سے دو گاڑیوں کو زور دار ٹکر مار دی۔ اس حادثے کی زد میں مالیگاؤں کے بجری واڑی علاقے کے رہائشی عبدالقیوم عبدالرزاق،سانپ پکڑنے والے (62 سال) کی موٹر سائیکل بھی آگئی، جس کے نتیجے میں وہ اور ان کے پوتے ائیل عبدالرحمن شدید زخمی ہوگئے اور دونوں کی جائے حادثہ پر ہی موت واقع ہوگئی۔ حادثے میں دو دیگر افراد بھی شدید زخمی ہوئے ہیں جن کا علاج جاری ہے۔

حادثے کے بعد کرین ڈرائیور اتل سنجے (22 سال)، ساکن ضلع اترپردیش، کو چاندوڑ پولیس نے حراست میں لے لیا ہے۔ اطلاع ملتے ہی پولیس اور امدادی ٹیمیں موقع پر پہنچ گئیں اور راحت رسانی کا کام شروع کیا۔ بعد ازاں کرین کی مدد سے حادثہ زدہ گاڑیوں کو سڑک سے ہٹایا گیا تاکہ ٹریفک کی روانی بحال کی جا سکے۔ چاندوڑ پولیس نے مقدمہ درج کرکے حادثے کی مزید تفتیش شروع کر دی ہے۔ ابتدائی جانچ میں تیز رفتاری کو حادثے کی ممکنہ وجہ قرار دیا جا رہا ہے، تاہم پولیس تمام پہلوؤں سے تحقیقات کر رہی ہے۔