مہاراشٹر میں پہلی جماعت سے فوجی تربیت دینے کا اعلان: وزیر تعلیم دادابھسے

ممبئی (ناؤنیوزاپڈیٹ) مہاراشٹر حکومت نے ایک انقلابی قدم اٹھاتے ہوئے اعلان کیا ہے کہ ریاست بھر کے اسکولوں میں پہلی جماعت سے ہی طلبا کو فوجی تربیت فراہم کی جائے گی۔ اس اقدام کا مقصد بچوں میں نظم و ضبط، حب الوطنی اور جسمانی مضبوطی جیسے اوصاف کو فروغ دینا ہے۔ یہ اعلان مہاراشٹر کے اسکولی تعلیم کے وزیر دادابھسے نے کیا۔ ان کا کہنا تھا کہ ابتدائی سطح پر فوجی تربیت کے ذریعے بچوں کو نہ صرف جسمانی طور پر مضبوط بنایا جائے گا بلکہ ان کی ذہنی نشوونما اور قومی جذبہ بھی پروان چڑھے گا۔

دادابھسے نے مزید کہا کہ اس تربیت کا ایک اہم پہلو ریٹائرڈ فوجیوں کی شمولیت ہوگی، جو اپنی تجربہ کاری کے ذریعے بچوں کی تربیت میں اہم کردار ادا کریں گے۔ ان کا کہنا تھا کہ اس پروگرام کے ذریعے بچوں میں خود نظم و ضبط، باقاعدہ جسمانی سرگرمی اور ملک سے محبت جیسے جذبات اجاگر کیے جائیں گے۔ ریاستی حکومت کی جانب سے اس فیصلے کو تعلیمی میدان میں ایک نیا تجربہ قرار دیا جا رہا ہے، جس کا مقصد نئی نسل کو ایک مضبوط، باکردار اور وطن دوست شہری کے طور پر تیار کرنا ہے۔