مالیگاؤں 2008 بم دھماکہ معاملہ: عدالت نے تمام ملزمان کو بری کر دیا، استغاثہ ناقابل اعتبار قرار

ممبئی (ناؤنیوزاپڈیٹ) مالیگاؤں بم دھماکہ کیس میں تقریباً 16 سال بعد ایک بڑی پیش رفت سامنے آئی ہے۔ ممبئی کی ایک خصوصی عدالت نے 2008 کے مالیگاؤں بم دھماکے کے مقدمے میں نامزد تمام ساتوں ملزمان کو ثبوتوں کی عدم موجودگی کی بنیاد پر بری کر دیا۔ بری کیے گئے افراد میں بی جے پی کی موجودہ رکن پارلیمان پرگیہ سنگھ ٹھاکر، لیفٹیننٹ کرنل پرساد پروہت، ریٹائرڈ میجر رمیش اپادھیائے، اجے راہیرکر، سمیر کلکرنی، سدھاکر چترویدی اور سدھاکر دھر دویدی شامل ہیں۔

عدالتی فیصلے کی تفصیلات

خصوصی جج اے کے لاہوتی نے اپنے فیصلے میں کہا کہ استغاثہ دھماکے کے پیچھے مضبوط اور قابل اعتبار ثبوت پیش کرنے میں ناکام رہا، اور عدالت محض شبہے کی بنیاد پر کسی کو سزا نہیں دے سکتی۔

عدالت نے یہ بھی قرار دیا کہ:

• اگرچہ دھماکے کی حقیقت تسلیم شدہ ہے، تاہم یہ ثابت نہیں ہو سکا کہ دھماکہ مخصوص موٹر سائیکل میں نصب بم کی وجہ سے ہوا۔

• سازش، میٹنگز اور ٹیلی فون کالز کی نگرانی سے متعلق جو شواہد پیش کیے گئے، وہ قانونی تقاضوں پر پورے نہیں اترتے تھے۔

• کال ریکارڈنگ اور نگرانی کے لیے جن اجازت ناموں کا دعویٰ کیا گیا، وہ قانوناً درست نہیں تھے۔

مزید برآں، عدالت نے انسداد دہشت گردی کے قانون یو اے پی اے کی دفعات کو مقدمے میں شامل کیے جانے کو بھی غیر قانونی قرار دیا اور کہا کہ ان دفعات کی منظوری میں قانونی سقم پایا گیا۔

متاثرین کے لیے معاوضے کا اعلان

عدالت نے ریاستی حکومت کو ہدایت دی ہے کہ دھماکے میں جاں بحق ہونے والے افراد کے اہلِ خانہ کو 2 لاکھ روپے اور زخمیوں کو 50،000 روپے بطور مالی امداد دی جائے۔

پس منظر

یہ دھماکہ 29 ستمبر 2008 کو مہاراشٹر کے ضلع ناسک کے مالیگاؤں شہر میں پیش آیا تھا، جو کہ پاور لوم انڈسٹری کے لیے جانا جاتا ہے۔ رمضان کے دوران مسلم اکثریتی علاقے میں واقع بھیکو چوک پر یہ دھماکہ اُس وقت ہوا جب لوگ عبادات سے فارغ ہوکر گھروں کو لوٹ رہے تھے۔ اس المناک واقعے میں 6 افراد جاں بحق اور 100 سے زائد زخمی ہوئے تھے۔
اس کیس کی سماعت برسوں جاری رہی، اور کئی مرتبہ تفتیشی ایجنسیوں پر جانبداری اور سیاسی دباؤ کے الزامات بھی لگتے رہے۔ عدالت کے مطابق تفصیلی فیصلہ جلد جاری کیا جائے گا۔ جبکہ اس فیصلے نے نہ صرف متاثرین کے زخموں کو تازہ کر دیا ہے بلکہ ملک بھر میں اس پر قانونی، سیاسی اور سماجی حلقوں میں بحث چھڑنے کا امکان بھی نظر آرہے ہے۔ واضح رہے کہ مالیگاؤں پولیس انتظامیہ کی جانب سے خاص بندوبست کیا گیا ہے تاکہ شہر میں امن و امان برقرار رہے۔ ایڈیشنل ایس پی تیگبیر سنگھ سندھو نے عوام سے اپیل کی ہے کہ وہ افواہوں پر دھیان نہ دیں اور پولیس انتظامیہ کے ساتھ تعاون کرتے ہوئے شہر میں پرامن ماحول کو قائم رکھیں۔