مالیگاؤں (اسٹاف رپورٹر) مالیگاؤں شہر کے نیاپورہ علاقے میں ایک دل دہلا دینے والے حادثے میں پانچ سالہ معصوم بچہ کرنٹ لگنے سے جاں بحق ہوگیا۔ واقعہ کے بعد علاقے میں غم و غصے کی لہر دوڑ گئی، جبکہ آزاد نگر پولیس نے حادثاتی موت کا مقدمہ درج کرکے تحقیقات شروع کر دی ہیں۔ پولیس ذرائع کے مطابق متوفی بچے کی شناخت محمد روشن خلیق الزماں (عمر 5 سال) ساکن نیاپورہ، گلی نمبر 4، مکان نمبر 67، مالیگاؤں کے طور پر ہوئی ہے۔ حادثہ 10 جون 2026 کی رات تقریباً 10 بجے نورانی مسجد کے سامنے واقع گلی میں پیش آیا، جہاں بچہ اپنے گھر کے قریب کھیل رہا تھا۔
ابتدائی معلومات کے مطابق کھیل کے دوران بچہ ایم ایس ای بی (بجلی کمپنی) کے ایک برقی کھمبے کے رابطے میں آگیا جس سے اسے شدید کرنٹ لگا۔ حادثے کے فوراً بعد اہل خانہ اور مقامی افراد نے بچے کو بچانے کی کوشش کی اور اس کے چچا جمیل احمد زین العابدین اسے علاج کے لیے مالیگاؤں سول اسپتال لے گئے۔ اسپتال میں ڈاکٹر علیم نے معائنہ کے بعد بچے کو مردہ قرار دے دیا۔ سول اسپتال کی جانب سے جاری ایم ایل سی نمبر 7674/2026 کی رپورٹ کے بعد آزاد نگر پولیس اسٹیشن میں حادثاتی موت رجسٹریشن نمبر 06/2026، دفعہ 194 بی این ایس ایس (BNSS) کے تحت مقدمہ درج کیا گیا۔
پولیس ریکارڈ کے مطابق اس واقعہ کی اطلاع مالیگاؤں سٹی پولیس اسٹیشن کے اہلکار گریش رام کرشن باگل (عمر 36 سال) نے دی۔ حادثاتی موت کا اندراج 11 جون 2026 کو رات 2:52 بجے کیا گیا۔ پولیس سب انسپکٹر آر۔ بی۔ کولی کو اس معاملے کا تفتیشی افسر مقرر کیا گیا ہے جبکہ سب ڈویژنل پولیس آفیسر مالیگاؤں سٹی سب ڈویژن اور دیگر افسران نے موقع کا معائنہ بھی کیا۔ واقعہ کے بعد مقامی شہریوں نے بجلی کے کھمبوں اور تاروں کی خستہ حالت پر شدید تشویش کا اظہار کرتے ہوئے ذمہ داروں کے خلاف سخت کارروائی اور متاثرہ خاندان کو مناسب معاوضہ فراہم کرنے کا مطالبہ کیا ہے۔ شہریوں کا کہنا ہے کہ اگر بروقت حفاظتی اقدامات کیے جاتے تو ایک معصوم جان بچائی جا سکتی تھی۔پولیس نے حادثے کی وجوہات اور ممکنہ غفلت کے پہلوؤں کی تحقیقات شروع کر دی ہیں جبکہ پوسٹ مارٹم رپورٹ اور دیگر شواہد کی بنیاد پر مزید قانونی کارروائی کی جائے گی۔