مالیگاؤں (ناؤنیوزاپڈیٹ) چنکاپور ڈیم سے مسلسل پانی کے اخراج اور بالائی علاقوں میں موسلا دھار بارش کے باعث گرنا ندی کی سطح میں تیزی سے اضافہ ہو رہا ہے۔ صورتحال کے پیش نظر مالیگاؤں میونسپل کارپوریشن اور پولیس انتظامیہ نے احتیاطی اقدامات تیز کرتے ہوئے نشیبی علاقوں میں رہائش پذیر خاندانوں کو محفوظ مقامات پر منتقل کرنا شروع کر دیا ہے۔ سرکاری ذرائع کے مطابق گرنا ندی کے کنارے قائم جھونپڑیوں میں رہنے والے 15 خاندانوں کے تقریباً 60 افراد کو احتیاطاً قریبی شیلٹر شیڈ میں منتقل کیا گیا ہے تاکہ کسی بھی ممکنہ حادثے سے بچا جا سکے۔ اس دوران متعلقہ پولیس انسپکٹر، میونسپل افسران، میونسپل کمشنر اور پولیس کے اعلیٰ حکام نے متاثرہ علاقوں کا دورہ کرکے صورتحال کا جائزہ لیا اور امدادی و حفاظتی انتظامات کا معائنہ کیا۔
انتظامیہ نے تمام متعلقہ محکموں کو ہائی الرٹ رہنے اور کسی بھی ہنگامی صورتحال سے نمٹنے کے لیے مکمل تیاری رکھنے کی ہدایت دی ہے۔ دوسری جانب چنکاپور اور ہرن باڑی ڈیم کے کیچمنٹ علاقوں میں مسلسل موسلا دھار بارش جاری ہے، جس کے باعث ڈیموں میں پانی کی آمد میں مسلسل اضافہ ہو رہا ہے۔ سرکاری اطلاعات کے مطابق ہرن باڑی ڈیم اپنی گنجائش کے قریب پہنچ چکا ہے اور وہاں سے 6,221 کیوسک پانی کا اخراج جاری ہے۔
انتظامیہ نے ہرن باڑی ڈیم کے زیرِ اثر علاقوں کے کسانوں، گرنا ندی کے کنارے رہنے والے شہریوں اور مالیگاؤں میونسپل کارپوریشن حدود کے تمام نشیبی علاقوں کے مکینوں سے اپیل کی ہے کہ وہ مکمل احتیاط برتیں، قیمتی سامان محفوظ مقامات پر منتقل کریں اور کسی بھی صورت میں ندی، نالوں یا سیلابی پانی کے قریب جانے سے گریز کریں۔ میونسپل کارپوریشن اور پولیس انتظامیہ نے عوام سے تعاون کی اپیل کرتے ہوئے کہا ہے کہ افواہوں پر یقین نہ کریں، صرف سرکاری ہدایات پر عمل کریں اور کسی بھی ہنگامی صورتحال میں متعلقہ سرکاری محکموں سے فوری رابطہ کریں تاکہ جانی و مالی نقصان سے بچا جا سکے۔