محمد کیف قتل معاملہ: لکشمن جگناتھ سونونے نامی شخص پر قتل کا مقدمہ درج

عوام افواہ نہ پھیلائیں، سوشل میڈیا پر پولیس کی نظر: ڈی وائے ایس پی تیگبیر سندھو

مالیگاؤں: عائشہ نگر پولیس اسٹیشن سے ملی تفصیلات کے مطابق فریادی محمد الیاس محمد عتیق احمد 35 سالہ نے عائشہ نگر پولیس اسٹیشن میں شکایت درج کروائی ہیکہ لکشمن جگناتھ سونونے ساکن سروے نمبر 42 نے انکے 7 سالہ محمد کیف کا اغوا کیا اور بے رحمی سے قتل کردیا۔ فریادی کی شکایت پر عائشہ نگر پولیس نے ملزم لکشمن جگناتھ سونونے پر گناہ رجسٹر نمبر 4/24 قلم ایکٹ دفعہ 363، 302، 201 کے تحت مقدمہ درج کرلیا گیا ہے۔ فی الحال ملزم پولیس کی حراست میں ہے۔

اس تعلق سے ڈی وائے ایس پی تیگبیر سندھو نے کہا کہ گزشتہ روز مالیگاؤں کے ساکن محمد کیف کی لاش چاندوڑ گھاٹ سے ملی۔ ابتدائی تفتیش کے بعد پولیس نے قتل کا شبہ ظاہر کیا اور تیز رفتار تفتیش جاری رکھتے ہوئے قتل کے الزام لکشمن جگناتھ سونونے کو گرفتار کر لیا۔ انہوں نے بتایا کہ اس قتل کے الزام میں عائشہ نگر پولس اسٹیشن میں دفعہ 302 قتل اور اغوا کرنے کی دفعہ 363 اور 201 کے تحت مقدمہ درج کیا گیا ہے۔

ایک سوال کے جواب میں انہوں نے کہا کہ پولیس تیز رفتاری سے جانچ پڑتال میں مصروف ہے کہ یہ قتل کیوں کیا گیا؟ قتل کے پیچھے کیا وجہ ہے؟ کون کون اس قتل میں شامل ہے؟ مکمل تفصیلات وقفے وقفے سے تحقیقات کے بعد پولیس جاری کریگی۔ انہوں نے عوام سے اپیل کی ہے افواہ نہ پھیلائیں، سوشل میڈیا پر پولیس کی نظر ہے۔ شہر کا لاء اینڈ آرڈر خراب کرنے والوں پر سخت کارروائی کی جائے گی ۔کل اس ملزم لکشمن کو عدالت میں پیش کئے جانے کا امکان ہے۔واضح رہے کہ سماجی کارکن شفیق شیخ(اینٹی کرپشن) اور حاجی خالد شیخ رشید نے دردناک داستان سناتے ہوئے بتایا کہ سفاک قاتل لکشمن نے محمد کیف کو سات دنوں تک بھوکا رکھا، اذیت دی اور دردناک موت دیکر محمد کیف کی زندگی تمام کردی۔ اس سلسلے میں عوام اس قاتل کو سزائے موت دینے کا مطالبہ کررہی ہیں۔