ناسک رابطہ وزیر کا عائشہ نگر آگ متاثر بستی کا دورہ، قانون کے مطابق سرکاری معاوضہ کا اعلان

جمعیتہ علماء سلیمانی چوک کے وفد کی آگ متاثرین سے ملاقات، ضروری دستاویز کو دوبارہ بنوا کر دیئے جانے کا تیقن 

مہاراشٹر کے مسلم اکثریتی شہر مالیگاؤں میں واقع عائشہ نگر نوری فنکشن ہال سے متصل بستی میں ایک مکان میں آگ لگنے کے سبب تقریبا 20 سے زیادہ مکانات متاثر ہوگئے۔ فائر بریگیڈ عملہ کی بدوقت کوشش سے کئی گھنٹوں کے بعد آگ پر قابو پانے میں کامیابی حاصل ہوئی۔ جس کے باعث کوئی جانی نقصان نہیں ہوا، لیکن بڑے پیمانے پر مالی نقصان کا اندیشہ بتایا گیا ہے۔ 

اس بھیانک آتشزدگی حادثے کے بعد ناسک رابطہ وزیر دادابھسے جی نے آگ متاثر بستی عائشہ نگر کا دورہ کرتے ہوئے متاثرین سے ملاقات کی، اور پرانت آفسر کے ساتھ تمام مکانات کا معائنہ کیا۔ رابطہ وزیر دادابھسے نے نمائندے کو بتایا کہ آتشزدگی کی وجہ سے 25 مکانات متاثر ہوئے ہیں۔ جن گھروں کا نقصان ہوا ہے، اس کے پنچنامے کا حکم پرانت آفسر کو دے دیا گیا ہے۔ پنچنامہ مکمل ہونے کے بعد جن کا نقصان ہوا انہیں حکومت کی جانب سے قانون کے مطابق معاوضہ دیا جائے گا۔ 

وہیں دوسری جانب جمعیۃ علماء (سلیمانی چوک مالیگاؤں) کے ایک وفد نے آگ متاثرین سے ملاقات کی اور متاثر مکانات کا سروے کیا۔ جمعیتہ علماء کے رکن انیس اظہر نے بتایا کہ اس حادثے میں جن افراد کے دستاویزات جل گئے ہیں، ان افراد کے سرکاری دستاویزات کو دوبارہ بنوا کر دیئے جائیں گے۔ اور جمعیتہ علماء کی جانب سے ایک کمیٹی تشکیل دی جائے گی، جس کے مکمل سروے کے بعد متاثرین کو دوبارہ بسانے کا بہتر طریقہ سے نظام کیا جائے گا۔ جمعیتہ علماء کے رکن نے کہا کہ ایسے مشکل حالات میں کچھ اوباش قسم کے افراد نے متاثرین کے گھروں میں مدد کی عزض سے گھس کر روزمرہ اور قیمتی اشیاء پر ہاتھ صاف کرلیا ہے۔ انہوں نے پولیس انتظامیہ سے مطالبہ کرتے ہوئے کہا کہ ایسے افراد کی شناخت کی جائے اور ان کیخلاف سخت کارروائی کی جائے۔