چھاپے کے دوران پولیس نے موقع سے جادو ٹونے میں استعمال ہونے والا مبینہ سامان ضبط کیا، جس میں لیموں، ہری چھڑی، ہلدی، کُم کُم، سرخ اور کالے دھاگوں میں پروئے گئے لیموں، کالی اڑد، اگربتی، رائی، تانبے کے برتن اور مختلف رنگوں کے کپڑے شامل ہیں۔ پولیس نے اس معاملے میں مہاراشٹر کے انسدادِ توہم پرستی و جادو ٹونا قانون کے تحت مقدمہ درج کرتے ہوئے 9 افراد کو گرفتار کیا ہے۔ گرفتار شدگان کا تعلق مالیگاؤں، ناسک، پونے، ناندگاؤں اور ساکوری سے بتایا جاتا ہے، جن میں ایک خاتون بھی شامل ہے۔
پولیس کے مطابق، گرفتار افراد میں سات کا تعلق مالیگاؤں سے ہے، جبکہ دیگر ملزمان بیرونی علاقوں کے رہائشی ہیں۔ تمام ملزمان کو مالیگاؤں کی عدالت میں پیش کیا گیا، جہاں عدالت نے انہیں اتوار تک پولیس ریمانڈ میں بھیج دیا۔ادھر، پولیس فرار ہونے والے ایک اور مشتبہ شخص کی تلاش میں مصروف ہے، جبکہ معاملے کی مزید تفتیش مالیگاؤں تعلقہ پولیس کے ذریعے جاری ہے۔